U Božićnoj poslanici, tokom tradicionalne ponoćne mise u Katedrali Svetog Petra Apostola u Baru, nadbiskup barski Rok Đonlešaj rekao je da su kroz ovu godinu doživjeli mnoge radosti i važne događaje za njihov život s Bogom.
- Doživjeli smo posvećenje nove katedrale u Baru, koja nam omogućava da se okupimo i shvatimo i doživimo neizmjernu Božiju ljubav, milosrdnog Oca koji nas neizmjerno ljubi i uvijek je spreman da nam oprosti grijehe i da nas zagrli. Upućen nam je poziv da budemo dobri vjernici. U ovoj svetoj noći, da li smo smogli snage pružiti ruku pomirenja svima onima sa kojima nismo bili pomireni - istakao je on.
Đonlešaj je pred nekoliko stotina vjernika katoličke vjeroispovjesti, s kojima su bili i njihovi pravoslavni i muslimanski prijatelji, služio Svečanu svetu misu, kojoj su prisustvovali kao gosti i predsjednik Skupštine opštine Radomir Novaković, i paroh barski, protojerej Slobodan Zeković, sveštenik Mitropolije crnogorsko-primorska.
- U svetoj noći i božićne dane okupljamo se oko oltara poput siromašnih pastira koji su na glas anđela pohitali do Isusovih jaslica. Naš oltar, naše obitelji, naše srce i naš život Kristove su jasle. Tu se on ponovno rađa i dolazi u našu sredinu. Naša crkva tako postaje njegov Betlehem, kuća kruha za sve izgladnjele duše. Nemojmo se bojati Kristu otvoriti sva vrata našeg života, vrata naših obitelji, vrata naše države, vrata našeg društva, vrata naših radosti i patnji... Budimo mi oni koji ga prepoznajemo, da mognemo imati mogućnosti biti djeca Božija. Svi naši božićni susreti neka nam budu susret s Kristom, neka nam učvrste vjeru, uvećaju nadu i umnože ljubav. On, djetešce iz Betlehema, nas uči „ljubiti svijet onakvim kakvim jest, da tako po nama dođe u taj svijet što više svjetla i mira”, najljepši dar djetešca koje nam se rodilo. Darovima mira, radosti i svijetla, svima Vama želim čestit i blagoslovljen Božić - kazao je, pored ostalog, u Božićnoj poslanici monsinjor Đonlešaj.
D.S.
Komentari
Komentari se objavljuju sa zadrškom.
Zabranjen je govor mržnje, psovanje, vrijedjanje i klevetanje. Nedozvoljen sadržaj neće biti objavljen.
Prijavite neprikladan komentar našem
MODERATORU.
Ukoliko smatrate da se u ovom članku krši Kodeks novinara, prijavite našem
Ombudsmanu.