Misija Fernanda Gaga na klupi argentinskog velikana Boke Juniors je završena nakon sedam mjeseci - dva dana nakon poraza od River Plejta u Superklasiku uprava kluba mu je uručila otkaz.

Odluku je Gagu, koji je Boku vodio na 30 mečeva i ostvario 17 pobjeda, uz pet remija i osam poraza, saopštio je predsjednik kluba, Huan Roman Rikelme.

Gaga je posla koštala i šokantna eliminacija od Alijanca Lime u drugoj fazi Kopa Libertadores, ali i poraz od Veleza u polufinalu kupa (3:4).

- Nije bilo lakao jer je u pitanju naš bivši igrač. Razgovarali smo i odlučili da Gago više nije naš trener. Zahvalni smo mu na svemu što je uradio, ne sumnjamo da je dao sve od sebe. Svakako da postoje okolnosti koje su nas natjerale da donesemo ovakvu odluku. Nema nikkakve misterije, sve je jasno, uvijek tako donosimo odluke - rekao je član uprave Maurisio Serna.

Do imenovanja novog trenera ekipu će voditi Marijano Heron. U argentinskim medijima kao kandidati za klupu Boke pominju se Gustavo Kinteros, Kristijan Kili Gonzales i Gabrijel Milito, koji su trenutno bez angažmana.