Mučno i teško, ali Engleska je na dva koraka od sna

Bajka Norveške je okončana u četvrtfinalu - Engleska je nakon produžetaka u Majamiju slavila sa 2:1, imala junaka u Džudu Belingemu, dvostrukom strijelcu i plasirala se u polufinale Svjetskog prvenstva. Za finale će se 15. jula u Atlanti boriti protiv Argentine ili Švajcarske. 

Morali su Englezi dobrano da se namuče i namučili su se, ali su na kraju imali više snage i dužu klupu. Norveška ima za čim da žali, Norveška je imala više igre u regularnih 90 minuta, ali sa veslanjem navijača skandinavske selekcije je završeno na ovom Mundijalu. 

Imali su Norvežani vođstvo koje im je donio Sjelderup sjajnim golom u 36. minutu, ali razliku je napravio Džud Belingem. Iz prve prave akcije u drugom minutu nadoknade prvog poluvremena je as Reala iskoristio asistenciju Gordona i izjednačio. 

U 55. minutu Norveška je stigla do drugog gola, Hegem je pogodio, ali je Klemon Turpan nakon intervencije iz VAR sobe poništio taj pogodak, jer je Erling Haland odgurnuo Andersona nakon kornera. 

Veliku priliku u 76. minutu imao je Ager, ali je nakon prekida umjesto mreže pogodio prečku. 

Imao je "Gordi Albion" sreće, meč je otišao u produžetke, a u junaka izrastao Belingem koji je nakon loše intervencije Nilanda nakon šuta Rodžersa, odbitak u 93. minutu sproveo u mrežu. 

Taj gol kao da je presjekao Norvežane, koji su ostali bez snage, pa je i Haland nakon prvog produžetka morao na klupu. 

Englezi su u drugom produžetku imali još dvije dobre situacije, ali je Niland zaustavio udarce Spensa i Sake. 

Engleska je na dva koraka od druge titule na koju čeka 60 godina, dok je bajka Vikinga završena.