Postoje istorijski momenti koje mi u Socijalističkoj narodnoj partiji nećemo i ne smijemo zaboraviti. Jedan od njih je i današnji dan, od prije 24 godine, kada su avioni NATO pakta bombardovali, u srcu Evrope suverenu zemlju, našu nekadašnju domovinu SR Jugoslaviju, saopštili su iz SNP-a.

- Tih 78 dana besomučnog stradanja, ostaju duboko urezani u pamćenje jednog naroda, i to se ne može promijeniti. Ne mogu se zaboraviti velike patnje nevinih ljudi, rušenje puteva, mostova, bolnica, aerodroma, tv centara i releja. Bilo je to vrijeme brojnih stradanja civila i pripadnika Vojske Jugoslavije. Gađano je i malo crnogorsko mjesto Murino gdje su ubijena nedužna djeca- ističu u SNP-u.

Neki su tada, kako kažu u SNP-u, bez odluke Ujedinjenih nacija, odlučili da pokrenu proces bombardovanja cijelog jednog naroda, prepuštenog samom sebi, uvjerenog da ima pravo da se brani i odbrani svoje.

- Uvijek ćemo se sjećati i zauvijek pamtiti nevine žrtve a svijet opominjati da se takvo stradanje nikada više nigdje i nikome ne smije ponoviti - zaključuju u SNP-u.