Čitav dan sam provela na korigovanju izdanja „Plodovi prosvjećivanja“ i nekako se loše osjećala cijelo vrijeme. Moje pismo Čertkovu se nije svidjelo Lavu Nikolajeviču. Šta ja tu mogu! Uvijek treba pisati samo istinu i ja sam ga, ne razmišljajući mnogo, ipak poslala. Iste večeri iza zatvorenih vrata su se sastali Lav Nikolajevič, Saša i Čertkov i počeli nekakav tajni razgovor, od kojega sam ja veoma malo čula, ali su često pominjali moje ime. Saška je šetala naokolo i provjeravala da ih ja ne prisluškujem, a kad me je vidjela, otrčala je da im kaže da me je vidjela, vjerovatno na balkonu, i da sam prisluškivala njihov tajni razgovor.
Opet me je steglo u srcu, bilo mi je nepodnošljivo teško. Onda sam, ne krijući se, ušla u sobu. Oni su sjedjeli, ja sam se rukovala sa Čertkovom i rekla im: „To opet tajno razgovarate o meni?“ Svi su se zbunili, a Lav Nikolajevič i Čertkov su počeli pričati nešto nepovezano i nejasno o dnevnicima i tako su izbjegli odgovor na moje pitanje, a Saška je odmah izašla vani.
Počelo je naporno razjašnjavanje sa Čertkovom. Lav Nikolajevič je otišao kod sina Miša, koji je tek stigao.
Ja sam mu ponovila šta sam napisala u gore navedenom pismu i molila ga da mi kaže koliko je kod njega svesaka dnevnika, gdje su one i kad ih je uzeo? Na ova pitanja Čertkov se razbjesnio i rekao mi da je to Lav Nikolajevič povjerio njemu i da on za to neće polagati nikome račune, pa čak ni Lavu Nikolajeviču. On mu je dao dnevnike zbog toga da u njima prekriži sve šta je intimno i loše.
Minutima se Čertkov smirivao i onda predložio da zajedno sa njim pazim na L.Nikolajeviča, živimo njegovim životom i služimo njegovim interesima. Kao da ja nijesam to radila bez njega svih ovih 48 godina. Ranije nas niko nije razdvajao i mi smo disali jednom dušom. „Two is company, three is not“ (Dvoje su društvo, a troje već nisu). I, eto, ovaj treći je i rasturio naš život. Onda je Čertkov rekao da je on taj duhovni ispovijednik Lava Nikolajeviča i da ću ja morati vremenom da se pomirim s tim.
14.jul. Nijesam spavala svu noć i zamalo se nijesam ubila. Ušao je Lav Nikolajevič, bila sam strašno uzbuđena i rekla sam mu ili da vrati dnevnike ili je sa mojim životom je svršeno, pa neka bira. I on je izabrao, zato mu hvala, vratio je dnevnike od Čertkova.
Saša je išao da donese dnevnike od Čertkova sa pismom Lava Nikolajeviča. Moja kćerka Tanja je spakovala i zapečatila dnevnike i sjutra će ih ponijeti sa mužem u Tulu da ih preda na banku.
Već treći dan ništa nijesam jela i zbog toga su se svi sekirali, ali to je najmanje vvažno.
Žao mi je i kajem se što sam naljutila moju djecu – Ljovu i Tanju, a posebno Tanju, jer je ona, bez obzira na sve, prema meni ljubazna, sažaljiva i dobra. Ja nju mnogo volim.
16. jul. Saznavši da ja svakodnevno pišem dnevnik, svi iz mog okruženja su počeli da pišu svoj dnevnik i svi su imali potrebu da me okrive, javno razobliče i daju nepoštene dokaze protiv mene, a sve zbog toga što sam se osmjelila da zastupam prava svog muža i poželim više povjerenja i ljubavi od njega i zbog oduzimanja dnevnika od Čertkova.
Bog s njima svima, meni treba moj muž, dok me njegovo hlađenje nije zamrzlo, meni je potrebna pravednost i čista savjest, a ne osuda ljudi.
Otišla sam sa Tanjom u Tulu, ostavile smo sedam svesaka Lavovih dnevnika u Državnu banku na čuvanje.
To je samo pola mog zadovoljenja. Od Čertkova je oduzeto, hvala Bogu, ali ih ja za života Lava Nikolajeviča nikad moći ni vidjeti ni čitati. I to je osveta moga muža. Kad su ih donijeli od Čertkova, ja sam ih sa uzbuđenjem uzela, prelistavala i tražila šta i o čemu tamo piše (mada sam dosta toga i ranije pročitala); imala sam osjećaj kao da su mi vratili moje voljeno dijete, koje mi pripada i opet mi ga oduzimaju. Mogu zamisliti koliko je Čertkov ljut na mene!
Naveče je padala kiša i bilo je strašno nevrijeme. Bože, kakva oluja! Nemoguće je spavati...
(Nastaviće se)
Preveo i priredio: VOJIN PERUNIČIĆ