PLAV – U Plavu je u toku javna rasprava o Nacrtu detaljnog urbanističkog plana „Plavsko jezero I faza”, koja će završnicu imati 24. avgusta u 12 časova. Kako je za „Dan” kazao Dževat Musić, rukovodilac ovih aktivnosti, na nedavno održanoj sjednici relevantnih organa o revitalizaciji i zaštiti Plavskog jezera jednoglasno je ocijenjeno da je Institut „Jaroslav Černi” iz Beograda uradio dobru i sveobuhvatnu Studiju (nacrt) valorizacije i zaštite Plavskog jezera, te da će nakon završene javne rasprave, Institut pripremiti predlog Studije, koji će se, poslije dobijenih saglasnosti od nadležnih državnih organa i institucija, proslijediti Skupštini opštine Plav na usvajanje.
– Valja napomenuti da se aktivnosti na zaštiti i revitalizaciji Plavskog jezera nastavljaju poslije usvajanja ove Studije, izradom projektno-tehničke dokumentacije za zaštitu unosa erozivnih materijala pritokama u Plavsko jezero i projektima uklanjanja i čišćenja deponovanog materijala u basenu jezera putem bagerovanja... kao i za čišćenje akvatične vegetacije sa obalnog prostora prema središtu Plavskog jezera – ističe Musić.
U Studiji je istaknuto da je Plavsko jezero protočno, leži na 906 mnv i najveće je jezero ledničkog porijekla u Crnoj Gori. Rijeka Ljuča, koja nastaje kod Gusinja spajanjem rijeke Grnčar (izvire u predjelu Maglića u Crnoj Gori, protiče kroz najsjeverniji dio Albanije i potom ponovo kroz Crnu Goru) i rijeke Vruje (koja izvire ispod Prokletija), glavna je pritoka jezera. Ujedno je jedno od najjužnijih evropskih jezera subalpskog tipa.
– Uskled prirodnih erozionih procesa i antropogenog faktora, Plavsko jezero se ubrzano zasipa i dolazi do postepene tranzicije jezerskog u močvarni ekosistem, što je posebno izraženo u litoralnom dijelu koji je obrastao trskom i ševarom. Plavsko jezero i neposredna okolina su predio izvanrednih prirodnih odlika. Jezero, plavne livade i pritoke su stanište brojnih rijetkih biljnih i životinjskih vrsta od kojih su neke endemske. Sa druge strane, Plavsko jezero je najvažniji razvojni resurs lokalne zajednice, pa je njegov opstanak od presudnog društveno-ekonomskog značaja za mještane Plava, Gusinja i okolnih naselja. Osnovna obilježja vodnog bilansa Plavskog jezera daje pritoka Ljuča sa svojim slivom, i otoka Lim, čije izvorište predstavlja upravo ovo jezero. Primarni razlog koji je doveo do izrade ove studije je stalno smanjenje površine i zapremine Plavskog jezera usled zasipanja nanosom i akumulacije biomase u plićim djelovima jezera (makrofitska vegetacija) – istaknuto je u Studiji i zaključeno da je neophodno zaštititi jezero od daljeg zasipanja nanosom, po potrebi redukovati eksterni i interni unos nutrijenata, i rehabilitovati djelove jezera koji su u velikoj mjeri zasuti nanosom.
Prvi korak ka zaštiti Plavskog jezera predstavlja izrada Studije njegove revitalizacije i zaštite koja sadrži predlog mjera, ograničenja i aktivnosti razvrstanih po prioritetima i dinamici koje će se u narednom periodu preduzeti na zaštiti i očuvanju jezerskog basena i neposrednog sliva. Studija treba da posluži kao osnova za izradu viših nivoa tehničke dokumentacije kojim bi se projektovali tehnički, biotehnički i biološki radovi i mjere za revitalizaciju i konzervaciju Plavskog jezera.
N.V.
Komentari
Komentari se objavljuju sa zadrškom.
Zabranjen je govor mržnje, psovanje, vrijedjanje i klevetanje. Nedozvoljen sadržaj neće biti objavljen.
Prijavite neprikladan komentar našem
MODERATORU.
Ukoliko smatrate da se u ovom članku krši Kodeks novinara, prijavite našem
Ombudsmanu.