U ostrvskom gradudržavi jugoistočne Azije Singapuru u petak su održani prvi predsjednički izbori poslije više od decenije.

Iako je funkcija predsjednika uglavnom ceremonijalna, šef države nadgleda finansijske rezerve, može da uloži veto na određene mjere i odobrava istrage protiv korupcije.

Odlazeća predsjednica Halima Jakob bila je jedini kandidat za predsjednika 2017.

Premijer Singapura je Li Hsijen Long iz Partije narodne akcije koja je na vlasti od 1959. godine. Šef države ne smije da pripada nijednoj partiji.

Izbori bi mogli da budu pokazatelj podrške Partiji narodne akcije uoči opštih izbora zakazanih za 2025. posebno nakon nedavnih skandala u zemlji  ostavke ministra saobraćaja usred istrage o korupciji i ostavke dvojice parlamentaraca zbog "neprikladnih" afera.

Favorit izbora je bivši potpredsjednik vlade i šef centralne banke Tarman Šanmugaratnam (66).

U skladu sa zakonom, on je napustio vladajuću stranku prije nego što se kandidovao na izborima za predsjednika.

Njegovi rivali su 75-godišnji Ng Kok Song, bivši direktor jednog od najvećih državnih fondova koji upravlja deviznim rezervama Singapura, i biznismen Tan Kin Lian, koji takođe ima 75 godina i bivši je izvršni direktor osiguravajućeg giganta.

Glasanje u Singapuru je obavezno za više od 2,7 miliona građana sa pravom glasa, prenosi b92.