Mornar je poražen od Borca u Čačku, čime je nastavio seriju loših rezultata u ABA ligi. 

Samo jedna pobjeda i čak 11 poraza su učinaka Barana do sada.

Iz meča u meč, nalazi se u sve težoj situaciji.

- Ko je bio u sali večeras, vidio je da iste ekipe nisu bile u prvom i drugom poluvremenu. Čestitam ekipi Borca, nametnuli su ritam na početku utakmice koji njima odgovara. Mi smo pravili katastrofalne greške u napadu, a u odbrani bili mekani. Kao da se nije radilo o meču koji nam život znači, a svaki je takav sada. Izašli smo sa boljom energijom u drugom poluvremenu. Bili smo fokusirani u odbrani i pronašli smo rješenja u napadu preko Markusa Vejtersa. Prišli smo na četiri razlike. Trebali smo nastaviti na isti način, ali smo imali nekoliko ishitrenih napada. Rekao sam plejmekeru da uradi jedno, a on je odigrao drugo. Propuštamo prilike i to nije dobro - istakao je trener Mihailo Pavićević.

Ipak, iskusni stručnjak ne gubi nadu.

- Htio ili ne, mi smo faktički na početku priprema. Ovo što radim sada, radi se u avgustu. Doveli smo mnogo igrača i treba to uklopiti. I meni prvom treba vremena da vidim koliko ko može, a sve moramo raditi u sprintu. Mislim da ćemo uspjeti da se skupimo i da od naredne utakmice krenemo u bolje rezultate, odnosno pobjede. Borcu želim sve najbolje u nastavku sezone, igraju zaista odlično - zaključio je Pavićević