GUSINjE –Osnovna škola „Džafer Nikočević“ iz Gusinja proslavila je 153 godine postojanja i plodonosnog rada. Proslavi su prisustvovali predsjednica opštine Gusinje Anela Čekić, direktori osnovnih i srednjih škola i javnih ustanova, predstavnici Fondacije „Gusinje“ i „Euro Gusinje“, predstavnik prosvjetne inspekcije, kao i penzionisani nastavnici i članovi školskog odbora, savjeta roditelja...
Direktor Šerif Feratović istakao je da je potvrda uspješnosti u oblasti vaspitanja i obrazovanja OŠ „Džafer Nikočević” i dobijanje prestižnog priznanja „Oktoih“, kao i Ordena zasluga za narod sa srebrnim znacima, Nagrade prosvjetnog rada, kao i bezbroj drugih priznanja, diploma, pehara, koje su osvajali učenici i nastavnici. On je napomenuo da je Dan škole 25. maj, ali je svečanost ranije upriličena zbog obaveza koje tog dana slijede.
-Ovaj lijepi majski dan ima posebnu moć i draž jer je okićen najljepšim cvijećem -osmijesima naših učenika, ljepotom i bistrim okom svakog našeg blaga, ponosom naše škole i sredine, ozarenim licima djevojčica i dječaka, najljepših prvaka. Naravno i motornom snagom naše škole -našim nastavnim kadrom i svima zaposlenima, koji su svojom istrajnošću i predanim radom učinili da mlade upute na pravi put. Ove školske godine navršavaju se 153 godine postojanja i rada naše škole. Svoju obrazovno–vaspitnu misiju škola je počela davne 1864. godine sa prvim učiteljem Matem Šijakovićem. Kao rijetko koja u okruženju, naša škola je opstajala i u teškim vremenima i uspjela da sačuva dostojanstvo i sklad. Uvijek je bila višejezična i jedna je od prvih građanskih škola na širem području. Nakon Drugog svjetskog rata škola postaje sedmogodišnja, a od 1951. osmogodišnja. Od 1963. godine, na predlog Opštinske organizacije saveza boraca, škola nosi ime prvoborca ovog kraja Džafera Nikočevića. Od 2006. godine postajemo devetogodišnja osnovna škola – podsjetio je Feratović i dodao da ne treba zaboraviti ni da je škola iznjedrila stotine generacija učenika od kojih su mnogi poznati i priznati stručnjaci različitih struka širom Crne Gore i svijeta. Feratović je izrazio uvjerenje da škola ide stopama tradicije ovog kraja i da će i ubuduće činiti sve što je dobro za njene đake „jer je to temelj razvitka Gusinja”.
N.V.
Komentari
Komentari se objavljuju sa zadrškom.
Zabranjen je govor mržnje, psovanje, vrijedjanje i klevetanje. Nedozvoljen sadržaj neće biti objavljen.
Prijavite neprikladan komentar našem
MODERATORU.
Ukoliko smatrate da se u ovom članku krši Kodeks novinara, prijavite našem
Ombudsmanu.
)){kind=small}
